Türkmenistanyň Taekwondo federasiýasynyň (WTF) ýolbaşçysy Bäşim Rozyýew Koreýa Respublikasyndaky Kukkiwon taekwondo akademiýasynyň attestasiýa toparynyň synaglaryny üstünlikli tabşyryp, halkara taekwondo akademiýasyny tamamlady. Şeýlelikde, gara guşagyň III klas 5-nji danynyň eýesi boldy we «Taekwando boýunça halkara derejeli tälimçi» diýen diplomy aldy.

Günorta Koreýa Respublikasyndaky Kukkiwon taekwondo akademiýasy birleşen taekwondo mekdepleriniň ýeke-täk okuw merkezi hasaplanýar. Bu merkez taekwondo sporty boýunça gözükdirijileri, ylmy okuw gollanmalary, maglumat beriji filmleri döredýär, şeýle-de taekwondonyň düzgün kadalaryna gözegçilik edýär.

Kukkiwon taekwondo boýunça halkara sport ussady derejesini, gara guşagyň ýokary danlaryny almak üçin iň abraýly Merkez hasaplanýar. Şonuň üçin-de bu ýerde seminar sapaklara gatnaşyp, iňlis dilinde synag tabşyryp diplom almak irginsiz zähmeti we türgenleşigi talap edýär.

Şu ýylyň 21-nji sentýabrdan 16-njy oktýabry aralygynda Günorta Koreýanyň paýtagty Seulda birnäçe ýurtlaryň taekwondo merkezleriniň tälimçileriniň gatnaşmagynda okuw türgenleşigi boldy. Şol sapaklara 60 döwletden taekwondo boýunça hünärmenler gatnaşdylar.

 Şirin ŞIRLIÝEWA,

«Türkmenistan Sport» halkara žurnaly.