«Ýuwentusyň» hem-de Portugaliýanyň ýygyndysynyň hüjümçisi Kriştianu Ronaldu Ýewro-2020 saýlama oýunlarynda, Ukrainanyň ýygyndysy bilen bolan duşuşykda (1:2) özüniň futbol durmuşynda 700-nji goluny geçirdi.
• 700 topy derwezä geçirmek üçin oňa 973 oýun gerek boldy. Ol her oýunda ortaça 0,72 gol geçirdi!
• Ol «Realda» 450, «Mançester Ýunaýtedde» 118, milli ýygyndyda 95, «Ýuwentusda» 32, «Sportingde» 5 gezek tapawutlandy.
• Ronaldu La ligada 311, çempionlar ligasynda 127, iňlis premýer ligasynda 84 gol geçirdi.
• Ol köplenç «Sewilýanyň» (27), «Atletikonyň» (25) hem-de «Hetafeniň» (23) derwezelerine gol geçirdi. Barselona bu sanawda bäşinji orunda (18).
• Ol 444 goly sag aýagynda, 126 goly çep aýagynda, 128 goly kellesi bilen, ýene iki goly bolsa göwresiniň beýleki bölekleri bilen geçirdi!
• Ronaldu özüniň ilkinji goluny mundan 17 ýyl ozal geçirdi. 2002-nji ýylyň oktýabrynda bolan duşuşykda ol pökgini derwezä urup, «Sportingiň» «Moreýrenseni» utmagyna ýardam edipdi.
34 ýaşly portugaliýaly futbolçy taryhda şeýle üstünlik gazanan altynjy futbolçy boldy. Ronaldudan başga öz sport durmuşlarynyň dowamynda braziliýalylar Romario we Pele, awstriýaly Ýozef Bisan, nemes futbolçysy Gerd Mýuller hem-de wengriýaly Ferens Puşkaş 700-den köp gezek gol geçirip tapawutlandylar.
