«Zenitiň» hüjümçisi Serdar Azmun «Benfikanyň» garşysyna bolan oýunda hasaby 3: 0 etdi. Hüjümçiniň duşuşygyň 78-nji minudynda derwezä geçiren bu goly onuň Çempionlar ligasynyň şu ýylky oýunlarynda ikinji topy boldy. Ýaryşyň toparlaýyn tapgyrynyň ilkinji duşuşygynda ol «Lionyň» derwezesine hem gol geçiripdi.
***
Çempionlar ligasynyň 2-nji tapgyrynda «Tottenhem» öz öýünde «Bawariýa» tarapyndan 2:7 hasabynda duw-dagyn edildi. Bu iňlis toparlarynyň ýewrokubok ýaryşlarynda iň uly hasap bilen ýeňlişidir.
***
Turiniň «Ýuwentusynyň» hüjümçisi Kriştianu Ronaldu bu ýaryşda özüniň 102-nji ýeňşini gazandy hem-de «Real» bilen «Portunyň» ozalky derwezeçisi Iker Kasilýasyň (101 ýeňiş) öňüne geçip, bu görkeziji boýunça birinji orna çykdy.
***
Çempionlar ligasynyň toparlaýyn oýunlarynyň ikinji tapgyrynda «Ýuwentusyň» hüjümçisi Kriştian Ronaldu «Baýeriň» garşysyna bolan oýunda (3:0) gol geçirmegi başardy. Bu pökgi 34 ýaşly portugal futbolçysynyň bu ýaryşda geçiren 127-nji goludyr. Ol «Mançester Ýunaýtediň» düzüminde 15, «Realda» 105, «Ýuwentusda» bolsa 7 gezek tapawutlandy. Bu görkeziji boýunça onuň iň golaýdaky garşydaşy Lionel Messidir. «Barselonada» çykyş edýän 32 ýaşly argentin futbolçysy bu ýaryşda 112 gezek tapawutlandy.
***
Çempionlar ligasynyň 2-nji tapgyrynda «Aýaks» myhmançylykda «Walensiýany» utdy (3:0). Şeýlelikde «Aýaks» ispan toparlaryny soňky iki oýunda umumylykda 7:1 hasabynda utdy («Aýaks» 2019-njy ýylyň martynda «Realy» 4:0 hasap bilen utupdy).
***
Çempionlar ligasynyň 2-nji tapgyrynda «Çelsi» myhmançylykda «Lilli» ýeňdi (2:1). Şeýlelikde «gökleriň» baş tälimçisi Frenk Lempard 2017-nji ýylyň martyndan bäri Çempionlar ligasynda ýeňiş gazanan ilkinji iňlis tälimçisi boldy.
***
«Çelsiniň» ýarym goragçysy Willian Çempionlar ligasynyň 2-nji tapgyrynda oýnuň başyndan meýdança çykdy. Bu oýun brazil futbolçysynyň «gökleriň» düzüminde ähli ýaryşlarda geçiren 300-nji duşuşygy boldy.
***
«Liwerpulyň» hüjümçisi Mohamed Salah Çempionlar ligasynyň 2-nji tapgyrynda «Red Bull Zalsburg» bilen duşuşykda 2 topy derwezä geçirdi (4:3, ikinji ýarymda). Şeýlelikde müsürli futbolçy «gyzyllaryň» düzüminde ähli ýaryşlarda eýýäm 77 pökgüni derwezä urdy.
***
Çempionlar ligasynyň ikinji tapgyrynda «Liwerpul» öz meýdançasynda «Red Bull Zalsburg» bilen geçiren duşuşygynda üç topy derwezesine goýberdi (4:3). Çempionlar ligasynda «Enfilde» geçiren duşuşyklarynda «Liwerpul» iň soňky gezek, 2014-nji ýylyň 22-nji oktýabrynda öz derwezesine üç pökgi geçirdipdi. Şonda ol Madridiň «Realyndan» 0:3 hasabynda ýeňlipdi.
***
Çempionlar ligasynyň ikinji tapgyrynda «Çelsi» 33-nji minutda Wiktor Osimheniň uran topuny öz derwezesine goýberdi. Şeýlelikde «Çelsi» şu möwsümde ähli ýaryşlarda geçiren on bir duşuşygynyň onusynda derwezesine pökgi geçirtdi.
***
«Aýaksyň» ýarym goragçysy Hakim Ziýeş Çempionlar ligasynyň ikinji tapgyrynda «Walensiýanyň» garşysyna bolan oýunda hasaby açdy. Şeýlelikde Ziýeş özüniň geçiren soňky 10 golunyň 8-sini , şol sanda Çempionlar ligasynda geçiren soňky üç goluny Tadiçiň pasyndan soň saldy.
