Türkmenistanyň Halk Maslahatynyň mejlisinde Hormatly Prezidentimiz Gurbanguly Berdimuhamedow Türkmenistanyň Birleşen Milletler Guramasynyň ýanyndaky Hemişelik wekili Aksoltan Ataýewa hem-de uçarman kosmonawt Oleg Kononenko Türkmenistanyň Gahrymany diýen belent ady dakmak hakyndaky Permana gol cekdi.
Türkmen döwlet habarlar gullugynyň resmi saýtynda habar berlişi ýaly, Türkmenistanyň Birleşen Milletler Guramasynyň ýanyndaky Hemişelik wekili Aksoltan Ataýewany ýurdumyzyň iň ýokary döwlet sylagy bilen sylaglamak, oňa — Türkmenistanyň Gahrymany diýen belent ady dakmak hakynda karara gelindi.
Hormatly Prezidentimiz ýurtlaryň arasyndaky gatnaşyklary geljekde hem giňeltmäge, iki döwletiň arasyndaky hyzmatdaşlygyň ägirt uly mümkinçiliklerini açmaga, onuň ugurlaryny giňeltmäge, netijede bolsa dostlukly türkmen-russiýa gatnaşyklaryny hil taýdan täze derejä çykarmak üçin özara tagallalary etmäge hemişe taýýardygymyzy tassyklap, Oleg Kononenko Türkmenistanyň Gahrymany diýen belent ady dakmak hakynda karara gelendigini aýtdy.
Türkmenistanyň BMG-niň ýanyndaky Hemişelik wekili Aksoltan Ataýewa hem-de uçarman kosmonawt Oleg Kononenko «Altyn Aý» medaly gowşuryldy.
Türkmenistanyň Gahrymanlarynyň terjimehaly bilen ýakyndan tanşan mahalyň olaryň sport bilen meşgullanýandyklaryny we ony wagyz etmäge goşant goşýandyklaryny görmek bolýar.
Aksoltan Ataýewa «www. news.un.or» saýtyna beren interwýusynda kärdeşleri bilen bilelikde sporty hemra edinýändiklerini, Türkmenistanyň sporty wagyz etmek baradaky başlangyçlaryna goşant goşmak üçin yhlasyny gaýgyrmaýandygyny gürrüň berýär. Hususanda, Türkmenistanyň Prezidentiniň başlangyjy bilen Bütindünýä welosiped gününiň döredilmeginiň dostlukly ýurtlaryň hemmesinde goldaw tapandygyny buýsanç bilen dile getirýär.
Uçarman kosmonawt Oleg Kononenko bolsa boş wagtlary sport bilen meşgullanmagy we kitap okamagy halaýandygyny aýdýar. Onuň woleýbol boýunça 1-nji derejesiniň bardygy Türkmenistanyň Gahrymany O.Kononenkonyň sportuň haýsy görnüşine has ezberdigini aýtmaga esas berýändir. Ol 1979-njy ýylda Olimpiýa ätiýaçlandyryş mekdebini tamamlapdyr. Oleg Kononenko 2009-njy ýylyň 5-nji fewralynda Russiýa Federasiýasynyň Gahrymany diýen at dakylypdyr.
