Türkmenistanda sportuň olimpiýa görnüşlerini wagyz etmek we ukyply türgenleri ýüze çykarmak maksady bilen dürli ýaryşlar yzygiderli geçirilip durulýar. Şeýle ýaryşlaryň biri badminton boýunça türkmen paýtagtynda guraldy. Aşgabat şäheriniň birinjiligini almak ugrundaky ýaryş üstünlikli tamamlanyp, ýeňijler belli edildi.
2002-nji ýylda doglan we kiçi ýaşly oglanlaryň arasynda ýekelikde geçirilen ýaryşda I ýeri Arslan Amanmyradow, II orny Mergen Nurmyradow, III ýeri bolsa Isa Gurbanow eýeledi.
Jübütleýin ýaryşmak boýunça I ýere Bilal Saryýew bilen Arslan Amanmyradow düşdi. Isa Gurbanow bilen Mergen Nurmyradow II ýeri, Arslan Sakçyýew we Durdymyrat Orazow dagylar III ýeri eýelemegi başardylar.
Gyzlaryň arasynda ýaryşda I orna Akjemal Takanowa mynasyp boldy. II we III orny bolsa Arzuw Haknazarowa bilen Gülşen Amanowa degişlilikde paýlaşdylar.
Jübüt bolup ýaryşmakda ilkinji baýrakly orna Gülşen Amanowa bilen Akjemal Takanowa düşdi. Nurana Gurbanowa we Arzuw Haknazarowa jübüti II orny, Halima Annaýewa bilen Edina Annaýewa bolsa III orny eýelediler.
Ýaryşyň ýeňijilerine Aşgabat şäheriniň sport we ýaşlar syýasaty Baş müdirliginiň hormat hatlary we ýadygärlik sowgatlary gowşuryldy.
