Ýurdumyzyň ähli künjeklerinde bolşy ýaly Daşoguz welaýatynda hem sport çäreleri yzygiderli geçirilýär. Sportuň basketbol görnüşi boýunça ezber türgenleri saýlap almagy maksat edinýän Daşoguz welaýatynyň birinjiligi dowam edýär. Ýaryş sentýabr aýynyň 21-ne başlap, 22-ne jemlener. Basketbol boýunça geçirilýän bäsleşige 2003-2004-nji ýyllarda doglan oglanlar gatnaşýar. Bu ýaryş Akdepe etrabynyň 2-nji sport mekdebinde geçirilýär.
***
Bedenterbiýe we sporty özüne dost tutunýan ýetginjekleriň sany barha artýar. Olaryň arasynda iň ökdelerini saýlamak göz öňüne tutulyp, birnäçe sport çäreleri geçirilýär. Şeýle ýaryşlaryň biri-de stol tennisi boýunça Daşoguz welaýatynyň kubogyny almak ugrundaky bäsleşikdir. Bu bäsleşik sentýabr aýynyň 22-sine tamamlanýar. Ýaryş Daşoguz şäheriniň 1-nji sport mekdebinde guralýar.
***
Daşoguz welaýatynda sentýabr aýynyň 20-sine başlanan futzal ýaryşynyň 22-sine jemlener. 2004-2005-nji ýyllarda doglan oglanlar futzal boýunça Daşoguz welaýatynyň birinjiligi ugrunda güýç synanyşarlar. Futzalçylaryň duşuşyklary Daşoguz şäheriniň “Garaşsyzlyk” sport desgasynda geçiriler.
***
Gubadag etrabynyň sport mekdebinde sportuň kikboksing görnüşi boýunça Daşoguz welaýatynyň birinjiligi ugrunda güýç synanyşdylar. 2005-2006, 2007-2008-nji ýyllarda doglan ýetginjekleriň arasynda geçirilen bu ýaryş sport bilen meşgullanmak isleýän ýaşlaryň sanynyň artýanlygyny görkezdi. Sentýabr aýynyň 20-sine başlanan bu bäsleşik 22-sine tamamlanar.
