Ýapyk binalarda we söweş sungaty boýunça V Aziýa oýunlarynyň ähmiýetli taraplarynyň biri-de ýurdumyzda elektron sportuň ösüşine täze badalga bermegidir. Iri halkara ýaryşyndan soňra Türkmenistanyň Milli elektron sporty federasiýasy döredilip, ol milli birinjilikleriň birnäçesini geçirdi. Olarda ýeňiji bolan ildeşlerimiz öz ukybyny halkara ýaryşlarda synamaga mümkinçilik aldylar.       

Ýakynda federasiýa öz resmi saýtynda elektron sport boýunça 2019 – 2020-nji ýyllaryň çempionatyna gatnaşjaklaryň bellige alynýandygyny habar berdi. Çempionat Dota 2, Pro Evolution Soccer we Counter-Strike: Global Offensive boýunça geçiriler. Täze möwsümiň ýaryşlaryna 25-nji sentýabrda badalga berler we ol 15-nji oktýabra çenli dowam eder.

Ýaryşyň düzgünleri we gatnaşyjylardan bildirilýän talaplar barada federasiýanyň saýtynda doly maglumat berilýär. Duşuşyklar federasiýanyň TWITCH kanaly arkaly göni ýaýlymda görkeziler.

Ýaryşlaryň ýeňijileriniň Aziýa çempionatynyň (WESG Mid Asia) Gazagystanda geçiriljek saýlama tapgyryna gatnaşmaga hukuk gazanjakdygyny ýatladýarys. Bu ýerde biziň ildeşlerimiziň garşydaşlary Gyrgyzystanyň, Täjigistanyň, Özbegistanyň we ýer eýeleriniň wekilleri bolar.

«Türkmen sporty» gazeti (07.09.2019).