Häzirki wagtda hormatly Prezidentimiziň tagallasy netijesinde sport ulgamy depginli ösdürilýär. Sport mekdeplerinde geçirilýän okuw-türgenleşik sapaklarynyň mazmuny baýlaşdyrylyp, okuwçylaryň sport işjeňligini artdyrmak üçin dürli çäreler geçirilýär. Paýtagtymyzda we welaýatlarda halkara ölçeglerine laýyk gelýän stadionlar, iri sport desgalary, sport mekdepleri gurlup, ulanylmaga berilýär. Häzirki wagtda Gahryman Arkadagymyzyň hut özüniň gatnaşmagynda açylan Gökdepe etrabynyň Yzgant şäherçesindäki sport mekdebinde hem ýaş türgenleri taýýarlamak işleri üstünlikli alnyp barylýar.
Sport mekdebimizde ýetginjekleri, okuwçylary sporta höweslendirmekde we ýaş türgenleri ýetişdirmek ugrunda yzygiderli tagalla edilýär. Mekdebimizde häzirki wagta çenli sportuň futbol, woleýbol, karatedo, milli göreş we sambo görnüşleri boýunça türgenleşik işleri geçirilen bolsa, şu ýyl Türkmen döwlet bedenterbiýe we sport institutynyň uçurymlarynyň işe gelmegi bilen, täze okuw ýylyndan olimpiýa oýunlarynyň düzümine girýän sport görnüşleri, ýagny gandbol, boks, suwda ýüzmek, ýeňil atletika we atçylyk sporty ýaly birnäçe görnüşler açyldy hem-de ýaş türgenleri taýýarlamak üçin ähli mümkinçilikler bar.
Sport mekdebiniň esasy wezipesi hem maksady ýaş türgenleri geljekde döwlet we halkara derejesindäki ýaryşlara taýýarlamakdan ybarat bolup durýar. Şu nukdaýnazardan ugur alyp, etrabymyzda bilim alýan sportuň ýokarda ady agzalýan görnüşlerine höwesek ýetginjekleri Yzgant şäherçesinde ýerleşýän dünýä ülňülerine laýyk gelýän enjamlar bilen doly enjamlaşdyrylan we türgenleşik sapaklary üçin ähli şertler döredilen sport mekdebimize türgenleşmäge çagyrýarys.
Mekdepde ýaşlary sporta çekmek üçin wagyz nesihat işleri hem yzygiderli geçirilýär. Olaryň sagdyn bedenli, arassa ahlakly bolup ýetişmekleri, şeýle-de, olarda sporta bolan söýgini döretmek maksady bilen geçirilýän işler öz oňyn netijesini berýär. Häzirki wagtda sport mekdebinde sport görnüşleri boýunça türgenleşik okuw-sapaklary talabalaýyk geçirilýär. Milli göreş, futbol, woleýbol, karate, sambo we söweş sambosy boýunça tälim alýan türgenler etrap, welaýat, ýurt derejesindäki ýaryşlarda gowy netijeleri gazanýarlar. Saýlap alan sport görnüşi boýunça tejribeli tälimçilerden tälim almaklary bolsa olaryň ussatlaryň hatarynda ýetişmegine oňyn şert döredýär.
Milli göreş boýunça tälimçi S.Bäşimowyň, karatedo boýunça tälimçi A.Ýuldaşowyň, woleýbol boýunça R.Kakalyýewiň, futbol boýunça Ý.Annagurbanowyň okuw-türgenleşik sapaklaryny ýokary derejede geçýändiklerini hem bellemek gerek.
Gahryman Arkadagymyz sagdyn durmuş ýörelgesine has ygrarly we ony wagyz ediji bolmak bilen, bu babatda watandaşlarymyza, ilkinji nobatda ýaşlara görelde görkezip, adam, onuň saglygy we abadançylygy hakyndaky aladany döwlet syýasatynyň ileri tutulýan esasy ugurlarynyň derejesine çykardy. Döredilýän şeýle şert-mümkinçilikler üçin hormatly Prezidentimize hoşallygymyz çäksizdir.
Gurbannazar
ÖWEZSÄHEDOW,
Ahal welaýatynyň Gökdepe etrabynyň Yzgant şäherçesindäki sport mekdebiň müdiri
