Aşgabatly 26 ýaşly halkara grossmeýster Saparmyrat Atabaýew Daşkentde tamamlanan «UzChess Cup Futures» atly halkara ýaryşda ýeňiji boldy. Bu barada «Türkmenistan: Altyn asyr» elektron gazeti habar berýär.

«Futures» ýaryşyna 7 ýurtdan 10 küştçi (8 halkara grossmeýster we 2 halkara ussat) gatnaşdy, olar 9 tapgyrly 90 minutlyk aýlaw ulgamynda «Iň güýçli» diýen ada eýe bolmak üçin, her oýunda 30 sekunt artdyrmak we 30-njy göçüme çenli deňme-deň gadaganlyk bilen bäsleşdiler.

Saparmyrat Atabaýew dokuz tapgyryň netijesi boýunça 6 utuk toplap, ikinji ýeri eýelän Ortik Nigmatowdan (Özbegistan) ýarym utuk, ilkinji üçlügiň soňkusy bolan ysraýylly grossmeýster Ýewgeniý Alekseýewden (reýtingi 2520) 1 utuk öňde barýar.

Abraýly küştçülerden düzülen toparlardan ýaryşda gazanylan ýeňiş we reýtingiň haýran galdyryjy derejede ýokary galmasy Saparmyrat Atabaýewiň şu ýylyň aprel aýynda halkara grossmeýster derejesini almagyny tassyklaýan ýene bir delildir. Onuň «UzChess Cup Futuresde» gazanan üstünligi türkmen küşt mekdebine güýçli itergi bolmak bilen, ýaş zehinleri jan edip işlemäge we täze belentliklere çykmaga höweslendirer.

Saparmyrat Atabaýew şu ýylyň noýabr aýynda Nýu-Delide (Hindistan) geçiriljek dünýä çempionaty ýaly ýokary derejeli ýaryşa gatnaşar.