Ýakynda Aşgabat şäheriniň bedenterbiýe we sport baradaky Baş müdirliginiň Ýöriteleşdirilen küşt-şaşka mekdebinde küştüň çalt oýnalýan blis hem-de rapid görnüşleri boýunça 20 ýaşa çenli ýetginjekleriň 100-den gowragynyň gatnaşmagynda ýurdumyzyň birinjiligi geçirildi.

Rapidde, ýagny çakgan küştde her göçüm üçin 10 sekunt artdyrmak bilen, her oýunça tutuş oýun üçin 15 minut wagt berilýär, blisde, ýagny ýyldyrym çaltlygyndaky küştde her oýunçynyň ygtyýarynda 3 minut bolýar, her göçüm üçin artdyrylýan wagt bolsa bary-ýogy 2 sekuntdyr.

Oglanlaryň arasynda rapid boýunça Türkmen döwlet binagärlik-gurluşyk institutynyň talyby Wepaly Halynyýazow baş baýraga mynasyp boldy. Bu küştçiniň mundan öň nusgawy görnüş boýunça hem ýeňiji bolandygyny bellemek gerek. Blis boýunça 100 göterim netije görkezen, 2016-njy ýylda 8 ýaşa çenli küştçüleriň arasynda dünýäniň çempiony bolan FIDE-niň ussatlygyna dalaşgär

Şageldi Gurbandurdyýew ýeňiji boldy. Şeýle-de, Şageldi rapid boýunça 3-nji orny eýelemegi başardy. Türkmen döwlet bedenterbiýe we sport institutynyň talyby Amanmuhammet Hommadowyň çykyşy hem bellenilmäge mynasypdyr. Ol üç görnüşde hem hormat münberine çykmagy başardy (1 kümüş, 2 bürünç).

Gyzlaryň arasynda doganlar Lala (19 ýaş) bilen Leýla (18 ýaş) Şöhradowalaryň ýeňişli ýollary dowam etdi. Bu bäsleşiklerden bir gün öň geçirilen nusgawy görnüşde çempion bolan Lala rapid görnüşinde guralan ýaryşda hem taý tapylmady. Blis boýunça bolsa baş baýrak Leýla nesip etdi. Lebap welaýatynyň küşt mekdebiniň beýleki wekilleri hem netijeli çykyş etdiler. Jahan Rejepowa bilen Mähri Agamyradowa (ikisi-de 15 ýaşynda) rapiddir blisde 2-3-nji orunlary eýelediler.

Baýrakly orunlara mynasyp bolanlara medallardyr ýadygärlik sowgatlar gowşuryldy.

«Türkmen sporty» gazeti