Lebap welaýatynyň Türkmenabat şäherinden Türkmen döwlet ykdysadyýet we dolandyryş institutynyň talyby Kadyr Jumaýew 2025-nji ýylda küşt boýunça Türkmenistanyň çempionatynyň birinji ligasyna gatnaşmak üçin geçirilen Aşgabat saýlama tapgyrynda ýeňiji boldy. Ol erkeklere-de, zenanlara-da gatnaşmaga rugsat berilýän açyk tapgyrynda ýeňiş gazanyp, şeýle üstünlige ýetdi. Dokuz tapgyryň netijeleri esasynda K.Jumaýew 7,5 utuk toplady.
Türkmenistanyň çempionatynyň (I liganyň) Aşgabat şäheri boýunça saýlama tapgyryna 99 türgen gatnaşdy, olaryň 79-sy açyk tapgyrynda, 20-si zenanlar tapgyrynda çykyş etdiler.
Dört küştçi ýeňijiden ýarym utuk yza galdy, ýöne goşmaça görkezijilere görä Türkmen döwlet bedenterbiýe we sport institutynyň talyby Ybraýym Serdarow ikinji ýeri eýeledi. Mary welaýatyndan 15 ýaşly mekdep okuwçysy Jennet Ýalkanowa üçünji orny eýeledi.
Zenanlar toparynda doganlar Läle we Bägül Wepaýewalar irki tapgyrlarda öňdeligi eýelediler. Şu ýylyň awgust aýynda Gyrgyzystanda 10 ýaşa çenli toparda Günbatar Aziýanyň çempiony bolan 9 ýaşly Läle 7,5 utuk toplap, ýaryşda ýeňiji boldy. Onuň dogany Bägül soňky iki oýunda utulyp, 6 utuk bilen 4-nji ýerde galdy. 6,5 utuk toplap, Daşoguz welaýatyndan 10 ýaşly Dilber Hupbyýewa we Mary welaýatyndan 9 ýaşly Jumasoltan Muhammetberdiýewa degişlilikde 2-nji hem-de 3-nji orny eýelediler.
«II ligasy» diýlip atlandyrylýan küşt boýunça milli çempionata sebit saýlama ýaryşlary indi iki ýyl bäri geçirilýär. Her tapgyryň netijelerine görä, indiki ýylyň başynda geçiriljek birinji ligasyna gatnaşmak üçin her sebitden iň gowy 10 küştçi saýlanar.
«Türkmen sporty» gazeti
