Türkmenistanyň Futbol federasiýasynyň edara binasynda Ýurdumyzda ýaşlar we çagalar ýetginjekler futboluny ösdürmek barada maslahat geçirildi.
Ýurdumyzyň ähli welaýatlaryna hem de paýtagtymyza wekilçilik edýän futbol hünärmenleriniň 50-ä golaýynyň gatnaşmagynda geçirilen maslahatyň dowamynda çagalar futbolyny ösdürmek baradaky dürli ugurdaky teklipler edildi.
«Köpetdag» toparynyň baş tälimçisi Begenç Garaýew öz çykyşynda ýurdumyzda futboly ösdürmek babatynda ähli mümkinçilikleriň bardygyny belläp geçdi.
Lebap welaýatyna wekilçilik edýän futbol tälimçisi Timur Husainow öz gezeginde ýaş tälimçileriň okuw maslahatlarynyň wagtly wagtyna geçirilip durulmagynyň kämil futbolçylary ýetişdirmekde uly ähmiýete eýedigini belledi.
Ýokary ligada çykyş edýän «Energetik» toparynyň tälimçisi Maksat Jumamyradow milli ýygyndymyzyň geljegi bolan ýetginjek futbolçylardan düzülen toparlaryň arasynda möwsümleýin çempionatyň geçirilmegini teklip etdi.
Umuman, geçirilen maslahatyň dowamynda çykyş eden beýleki futbol hünärmenleriň teklipleri hem diňlenilip, Türkmenistanyň Futbol federasiýasynyň ýolbaşçylar düzümi tarapyndan bu babatda golaý wagtda giň gerimli işleriň geçiriljekdigi bellenildi.
«Türkmen sporty» gazeti
