BMG-niň Baş Assambleýasy Merkezi Aziýa Futbol assosiasiýasynyň (GAFA) teklip etmegi boýunça Bütindünýä futbol gününi yglan etmek hakynda Kararnamany kabul etdi. Kararnamanyň taslamasyny BMG-niň agzasy bolup durýan döwletleriň 70-den gowragy goldady.
Beýana görä, Baş Assambleýa, «1924-nji ýylda Parižde geçirilen tomusky Olimpiýa oýunlarynyň çäklerinde ähli sebitleriň wekilleriniň gatnaşmagynda taryhda ilkinji gezek halkara futbol ýaryşynyň geçirilenine 2024-nji ýylda 100 ýyl dolýanlygy mynasybetli, 25-nji maýy Bütindünýä futbol güni diýip yglan etmegi karar edýär».
Resminama agza döwletlere «jemgyýetde fiziki we psihiki saglygy hem-de abadançylygy berkitmegiň we sport medeniýetini terbiýelemegiň serişdesi hökmünde milli we ýerli derejelerde, futboly hem goşmak bilen, sporty we fiziki işjeňligi ösdürmek boýunça strategiýalary we maksatnamalary kabul etmegi» teklip edýär, şeýle hem «milli aýratynlyklara laýyklykda, Bütindünýä futbol gününi bellemegi we futbolyň hemmeler üçin, şol sanda bilim we maglumat-aň-bilim işleriniň çygyrlarynda artykmaçlyklary hakynda habarlary ýaýratmagy teklip edýär».
Bu Kararnama parahatçylyk, özara düşünişmek, halkara hyzmatdaşlygy, dostluk we mylakatlylyk hem-de hiç hili kemsitmelere ýol berilmesizlik ruhunda iri halkara sport çärelerini geçirmegiň wajyplygyny aýratyn belleýär.
Futbol bilen meşgullanmak saglygy berkitmegiň we sagdyn durmuş keşbini wagyz etmegiň iň gowy tärleriniň biridir, şeýle hem dürli halklary we milletleri birleşdirmegiň möhüm serişdesidir.
Senenamada 10-njy dekabrda bellenilýän resmi däl baýramçylyk ― Bütindünýä futbol güni bar. Şeýlelik bilen, halkara bileleşigi köp millionlar üçin ýöne bir oýun däl-de, ýaşaýyş täri bolan bu sport görnüşine sarpa bildirýär. Toparlaýyn oýnuň resmi kadalary 1863-nji ýylda Angliýanyň Futbol assosiasiýasy tarapyndan berkidilipdir. Hut şol döwürde oýun meýdançasynyň we derwezäniň ölçegleri ýazylyp taýýarlanypdyr. 1904-nji ýylda Halkara Futbol federasiýasy (FIFA) döredilipdir.
26-njy iýulda Fransiýada hasap boýunça XXXIII tomusky Olimpiýa oýunlarynyň açylyş dabarasynyň boljakdygyny ýatlap geçeliň. Futbol boýunça bäsleşikleri erkekleriň we zenanlaryň arasynda Parižde we beýleki şäherleriň altysynda geçirmek meýilleşdirilýär.
Internet neşirleriniň maglumatlary esasynda taýýarlanyldy.
