21 — 26-njy fewral aralygynda Balkan welaýatynyň «Awaza» milli syýahatçylyk zolagynda ýaşlaryň we ýetginjekleriň arasynda adaty karate boýunça Türkmenistanyň birinjiligi geçirildi. Ýaryşa ýurdumyzyň welaýatlaryndan we Aşgabat şäherinden 300-e golaý türgen gatnaşdy. Birinjilikde Aşgabat şäheriniň bedenterbiýe we sport baradaky Baş müdirliginiň adaty karate boýunça ýygyndy topary şowly çykyş edip, toparlaýyn 1-nji orna mynasyp boldy. Paýtagtyň ýygyndysyna Döwlet Berdiýew tälimçilik etdi.

Şeýlelikde, 8-9 ýaşly oglanlaryň arasynda şahsy tutluşykda we şahsy kata boýunça Şamil Guseýnow, şahsy tutluşykda 8 — 10 ýaşly gyzlaryň arasynda Aýlar Artykowa, 10-11 ýaşlylaryň arasynda Selim Ýangibaýew, 12-13 ýaşly pälwanlaryň arasynda şahsy tutluşykda Çerkez Myratdurdyýew, şahsy kata görnüşinde 12-13 ýaşly türgenleriň arasynda Meýlis Çaryýew, 10 — 13 ýaşly gyzlaryň arasynda Gülzada Pirişowa, 14-15 ýaşly türgenleriň arasynda Yhlas Annagurbanow, 16-17 ýaşly ýetginjekleriň arasynda şahsy tutluşykda Ýagmyrmyrat Sähetmyradow, 16-17 ýaşly türgenleriň arasynda şahsy kata boýunça Kerim Allamyradow dagy 1-nji orny eýeledi.

Ýaryşyň ýeňijilerine Hormat hatlarydyr sowgatlar gowşuryldy.

«Türkmen sporty».