Aşgabat şäheriniň Olimpiýa şäherçesindäki Tennis toplumynda 12 ýaşa çenli oglanlaryň we gyzlaryň arasyndaky Merkezi Aziýanyň tennis çempionatynyň jemi boýunça türgenleri sylaglamak dabarasy boldy.
Oglanlaryň arasyndaky ýaryşda Gazagystanyň ýygyndysy ýeňiji boldy. Bu ýerde 2-nji orny Türkmenistanyň ýygyndysy eýeledi. 3-nji orna Özbegistanly ýaş tennisçiler mynasyp boldular.
Gazagystandan gelen ýaş tennisçiler gyzlaryň ýaryşynda-da 1-nji orna mynasyp bolmagy başardylar. Bu bäsleşikde 2-nji orny Özbegistanyň, 3-nji orny Türkmenistanyň ýygyndysy eýeledi.
Türgenleri sylaglamak dabarasynda 2023-nji ýylyň 5-nji iýunyndan bäri dowam edip gelýän sebitimiziň tennis çempionatynyň ýeňijilerine Gahryman Arkadagymyzyň we hormatly Prezidentimiziň adyndan gymmat bahaly sowgatlar gowşuryldy. Munuň özi Merkezi Aziýanyň ýaş tennisçilerini Aşgabatda jemlän halkara ýaryşa Türkmenistanda uly ähmiýet berilýändigini görkezýär.
Merkezi Aziýanyň tennis çempionatynyň (U12) dowamynda oňa gatnaşan myhmanlar we halkara sport guramalarynyň ýolbaşçylary Türkmenistanyň paýtagtynda tamamlanýan tennis ýaryşynyň guramaçylyk babatda ýokary derejede geçirilendigini bellediler.
12 ýaşa çenli oglanlaryň we gyzlaryň arasyndaky Merkezi Aziýanyň tennis çempionaty 4 ýyl mundan ozal hem Aşgabat şäherinde geçirilip, şol ýaryş hem bilermenleriň ýokary bahasyna mynasyp bolupdy.
Surata düşüren Dörtguly Myratgulyýew.
