Şu gün Aşgabat şäherinde 12 ýaşly we şondan kiçi ýetginjek oglan-gyzlaryň arasynda tennis boýunça Merkezi Aziýa ýurtlarynyň sebitleýin ýaryşynyň üçünji gününiň oýunlary geçirildi.
Bu günde Türkmenistanyň ýygyndy topary sport ýaryşynyň geçen ýyl Daşkent şäherinde geçirilen oýunlarynyň ýeňijisi Gazagystanyň topary bilen duşuşdy. Olimpiýa şäherjiginiň tennis toplumyndaky meýdançada iki topar hem çekeleşikli bäsleşdiler.
Gazagystanyň ýygyndysyna garşy geçirilen oýunlar ildeşlerimiz üçin turuwbaşdan ýeňil bolmady. Netijede, has tejribeli gazagystanly tennisçiler ýeňiş gazandylar.
Şu günki geçirilen ýekeleýin we toparlaýyn duşuşyklarda Gazagystanyň oglanlar we gyzlar toparlary sport ýaryşynda ýeňiji bolmak üçin uly ädim ätdiler. Ýeňiji bolmak üçin olar Gyrgyzystanyň we Özbegistanyň toparlary bilen duşuşyklary geçirerler. Özbegistanyň ýygyndysy 8-nji iýunda ýer eýeleri – ýurdumyzyň ýygyndy topary bilen duşuşyklary geçirerler.
Ertirki oýunlaryň geçiş tertibine laýyklykda, Gazagystan Gyrgyzystan bilen, Täjigistan hem Owganystan bilen duşuşyklary geçirer.
12 ýaşly we şondan kiçi ýetginjek oglan-gyzlaryň arasynda tennis boýunça Merkezi Aziýa ýurtlarynyň sebitleýin ýaryşy 9-njy iýunda tamamlanar.
