Suwda ýüzmek boýunça türkmen ýygyndysynyň agzalary Özbegistanyň Daşkent şäherinde geçirilen halkara ýaryşynda uly üstünliklere eýe boldular. Ýaponiýanyň Fukuoko şäherinde geçiriljek suwda ýüzmek boýunça dünýä çempionatyna gatnaşmaga hukuk gazanmak maksady bilen guralan bu ýaryşa 20-den gowrak klub toparlary gatnaşdy.
Türkmen ýygyndysynyň gazanan medallary türgenlerimiziň has-da uly üstünliklere tarap uzaýan ynamly ädimleriniň nyşany boldy. Olaryň aglabasynyň Türkmenistanyň Ýokary sport ussatlygy mekdebiniň türgenleridigini hem aýratyn bellemelidiris. Munuň özi ussat hünärmenler Wladimir Nowikow bilen Mark Pilýuginiň ýolbaşçylygyndaky türkmen topary üçin ajaýyp tejribe boldy.
100 metre erkin usulynda ýüzmekde Türkmenistanyň Içeri işler ministrliginiň 1001 harby bölüminiň esgeri Musa Žalaýew kümüş medal gazandy. 200 we 100 metr aralyklara arkanlygyna ýüzmekde Aşgabat şäheriniň bedenterbiýe we sport baradaky Baş müdirliginiň 14-nji sport mekdebiniň tälimçisi, halkara derejeli sport ussady Merdan Ataýew hemmelerden rüstem çykyp, ýurdumyzyň baýrak gaznasyna altyn medallary getirdi. Paýtagtymyzdaky 15-nji orta mekdebiň okuwçysy Dawid Akopýan bolsa 12 — 17 ýaşly türgenleriň arasynda brass usulynda 50 metre guralan bäsleşikde ýeňiji boldy. Ol 100 metre brass ýaryşynda hem bürünç medala eýelik etdi. Aşgabat şäherindäki 42-nji orta mekdebiň okuwçysy Selim Nazarow bolsa 12 — 17 ýaşly ýüzüjileriň 100 metrlik menzili brass usulynda geçmekdäki ýaryşyna gatnaşyp, hormat münberiniň ikinji basgançagyna çykdy. Aşgabat şäherindäki 68-nji orta mekdebiň 11-nji synp okuwçysy Aýnura Primowa 100 metre arkanlygyna ýüzmek boýunça guralan bäsleşigi bürünç medal bilen tamamlady.
Aşgabat şäherindäki 12-nji orta mekdebiň 11-nji synp okuwçysy Anastasiýa Morgenşterniň üstünlikleri hem aýratyn bellenmäge mynasypdyr. Onuň boýnuny
50 metre erkin usulynda ýüzmekde gazanan altyn, 50 metri batterflýaý görnüşinde geçmekde eýelän kümüş medallary bezedi.
Musa Žalaýewden, Dawid Akopýandan, Arslan Gaýypnazarowdan hem-de Eminguly Ballykowdan ybarat bolan erkekler ýygyndymyzyň 4x100 metre toplumlaýyn estafeta ýaryşynda (4 minut 7 sekunt) hem kümüş medala mynasyp bolandygyna ünsi çekmelidiris. Şeýle ýaryşa gatnaşan gyzlar toparymyza Aýnura Primowa, Waleriýa Mirenskaýa, Anastasiýa Morgenştern we Aýnur Merdanowa wekilçilik etdi. Gyzlar toparymyz (5 minut 9 sekunt) toplumlaýyn estafeta ýaryşynyň bürünç medalyny eýeledi.
«Türkmen sporty» gazeti.
