Russiýa Federasiýasynyň Kemerowo oblastynyň «Kuzbass» buzly köşgünde «Aziýanyň çagalary» II gyşky Halkara sport oýunlarynyň dabaraly açylyş çäresi boldy.
Bäsleşiklere dünýäniň 13 ýurdundan, şol sanda Russiýa Federasiýasyndan, Belarus Respublikasyndan, Gazagystandan, Türkmenistandan, Özbegistandan, Gyrgyz Respublikasyndan we Mongoliýadan ýaşajyk wekiller gatnaşýar.
Konkide ylgamak boýunça türgenleriň ýaryşlary 1-nji, 2-nji we 3-nji martda «Kuzbass» buzly köşgünde badalga alar. Snoubordçylar Taştagol raýonynyň dag lyža sporty we snoubord boýunça merkeziniň eňňitlerinde çykyş ederler. Türkmen wekiliniň çykyş edýän ugurdaş görnüşleri boýunça medallar ugrunda bäsleşikler 1-nji we 2-nji martda geçiriler.
Türkmen türgenleri bu ýaryşlarda görnüşleriň üçüsi: figuralaýyn typmak, şort-trek we garda oýnalýan woleýbol boýunça ýurdumyzyň adyndan wekilçilik ederler diýip, «Türkmenistan: Altyn asyr» neşiri habar berýär.
Türkmen türgenleri figuralaýyn typmak boýunça 27-nji fewral ― 1-nji mart aralygynda Nowokuzneskiniň «Oleg Korolenkonyň Kuzneskiý arenasynyň metallurglary» sport toplumynda gysga we erkin maksatnamalar bilen çykyş ederler.
Türkmenistanyň konkide ylgamak boýunça ýygyndy toparynyň ýaş türgenleri «Kuzbass» buzly köşgünde 500 we 1000 metr aralyklara şort-trek boýunça birinjilik ugrunda bäsleşerler. Sportuň bu görnüşi boýunça ýaryşlar 28-nji fewral ― 1-nji mart aralygynda geçiriler.
Garda oýnalýan woleýbol boýunça ýaryşlara Türkmenistan türgenleriň dördüsini hödürlär. Ýaryşyň guramaçylary sportuň bu görnüşi, şeýle hem snoubord we fristaýl boýunça ýaryşlary Kemerowo oblastynyň Taştagol raýonynyň «Şeregeş» dag lyža toplumynda geçirmegi meýilleşdirýärler.
«7/24.tm»
