5-nji ýanwarda Türkmenistanyň Bedenterbiýe we sport baradaky döwlet komitetiniň mejlisler zalynda 2023-nji ýylyň «Arkadag Serdarly bagtyýar ýaşlar ýyly» diýlip yglan edilmegi mynasybetli maslahat geçirildi. Maslahata ýurdumyzyň Bedenterbiýe we sport baradaky döwlet komitetiniň, Aşgabat şäheriniň bedenterbiýe we sport baradaky Baş müdirliginiň wekilleri gatnaşdylar.

Hoşallyk maslahatyny Aşgabat şäheriniň bedenterbiýe we sport baradaky Baş müdirliginiň sport bölüminiň başlygy M.Agabaýew alyp bardy. Onuň dowamynda «Türkmenistan» Ýaşlar bedenterbiýe-sport guramasynyň başlygynyň orunbasary M.Selimow, Aşgabat şäheriniň bedenterbiýe we sport baradaky Baş müdirliginiň hünärmeni E.Ýusupowa, Ýöriteleşdirilen küşt we şaşka mekdebiniň tälimçisi Ý.Öwezowa, Gyşky oýunlar sport toplumynyň şepagat uýasy H.Taganowa, «Aşgabat» köpugurly stadionynyň medeniýet bölüminiň müdiri B.Hamedow dagy çykyş etdi. Çykyşlarda ýurdumyzda her bir ýyly mynasyp at bilen atlandyrmagyň asylly däbe öwrülendigi, Arkadag Serdarly bagtyýar ýaşlar ýylynyň şygarynda hem-de nyşanynda ýurdumyzyň ýagty geljeginiň eýeleri, häzirki ösüşlerimiziň güwäsi bolan ýaş nesil baradaky aladanyň şöhlelenýändigi beýan edildi.

Hoşallyk maslahatyna gatnaşyjylar Watanymyzyň gülläp ösmegi, halkymyzyň bagtyýar durmuşy hem-de ýaş nesliň bagtly geljegi ugrunda uly tagallalary edýän Gahryman Arkadagymyzyň we Arkadagly Serdarymyzyň adyna tüýs ýürekden alkyş aýtdylar.

Rahat SAMATOW,

Türkmenistanyň Bedenterbiýe we sport baradaky döwlet

komitetiniň bedenterbiýe we köpçülikleýin sport çärelerini

guramak bölüminiň başlygynyň orunbasary, komitetiň Kärdeşler arkalaşygynyň ilkinji guramasynyň başlygy.