Futbol boýunça Türkmenistanyň milli ýygyndysy 2023-nji ýylda geçiriljek Aziýa kubogynyň saýlama duşuşyklarynyň öňüsyrasynda Taýlandda okuw-türgenleşik ýygnanyşygyny geçirýär. Türkmenistanyň milli ýygyndysynyň tälimçileri okuw-türgenleşik ýygnanyşygyna we yklym ýaryşynyň saýlama tapgyryna futbolçylaryň 23-sini çagyrdy. Taýlandyň ýygyndysy bilen geçirilen ýoldaşlyk duşuşygy 1:0 hasabynda garşydaşymyzyň peýdasyna tamamlandy. Türkmenistanyň ýygyndysy saýlama tapgyrda «E» toparçada çykyş eder. Ildeşlerimiz toparçada Bahreýniň, Malaýziýanyň hem-de Bangladeşiň ýygyndylary bilen güýç synanyşar. Ildeşlerimiz 8-nji iýunda Malaýziýa, 11-nji iýunda Bangladeş bilen duşuşar. Şondan 3 gün soň bolsa toparçadaky iň soňky oýunda Bahreýniň ýygyndysy bilen güýç synanyşar. Saýlama tapgyrynyň jemi boýunça Aziýa kubogynyň final tapgyryna ýygyndylaryň 11-si (ýeňijiler we toparçada 2-nji orna düşenleriň 5-si) gatnaşar.
