Türkmenistanda alnyp barylýan döwlet syýasaty netijesinde jemgyýetde sagdyn durmuş ýörelgesini wagyz etmek boýunça işler alnyp barylýar. Halkyň saglygy, adamlaryň fiziki we beden taýdan sagdyn bolmagy hakyndaky alada döwlet derejesinde möhüm ähmiýet berilýän meseleleriň hatarynda durýar. Şonuň üçinem, Türkmenistanda Bütindünýä saglyk güni mynasybetli dabaralar giň gerime eýe bolýar.
Aşgabat şäheriniň häkimliginiň hem-de Türkmenistanyň jemgyýetçilik guramalarynyň başlangyjy esasynda, Bütindünýä saglyk güni mynasybetli paýtagtymyzda ekologik abadançylyga ýardam berýän awtoulagsyz günler geçirilýär. Habar berlişi ýaly, 2022-nji ýylyň 4-11-nji apreli günlerinde sagat 08:00-dan 18:00-a çenli Aşgabat şäherinde ulaglaryň hereketi çäklendirilýär.
Aşgabadyň köçelerinde welosipedli ýörişler geçirilip, oňa isleg bildirýänleriň hemmesi gatnaşyp biler. Aşgabatlylar we paýtagtymyzyň myhmanlary üçin şäheriçi awtobuslardan we ýeňil taksi awtoulaglary hyzmat edýär.
Türkmenistanda Bütindünýä saglyk gününi sagdyn durmuşy we ekologiýany goramagy wagyz edýän bedenterbiýe we sport çärelerini geçirmek asylly däbe öwrüldi.
