Türkmenistanyň futbol boýunça milli ýygyndysynyň we «Altyn asyr» futbol toparynyň hüjümçisi Altymyrat Annadurdyýew milli çempionatymyzyň 19-njy tapgyrynda «Energetik» bilen geçirilen duşuşykda 2 gezek tapawutlandy. Duşuşyk «Altyn asyryň» peýdasyna 2:0 hasabynda tamamlandy.

Şeýlelikde, Altymyrat Annadurdyýew çempionatyň şu möwsüminde geçiren pökgüleriniň sanyny 20-ä tegeläp bilen ilkinji futbolçy boldy. Mary şäherindäki «Energetik» stadionynda geçirilen duşuşykda Altymyrat Annadurdyýew başga-da bir üstünligi gazandy. Has takygy, şu duşuşykda geçiren ilkinji goly Altymyrat Annadurdyýewiň Türkmenistanyň çempionatynda geçiren 100-nji pökgüsi boldy.

Altymyrat Annadurdyýewiň Ýokary ligada 2015-nji ýyldan bäri çykyş edip gelýändigini ýatladýarys. Ol «Ahalyň» düzüminde Ýokary ligada oýnap başlan ýylynda 22 pökgi geçirip, uly futboldaky iň gowy netijesini gazanypdy.  

2016-njy ýylda «Altyn asyryň» düzümine goşulan Altymyrat Annadurdyýew möwsüme şikes bilen başlasa-da, 15 pökgi geçirmägi başardy. Şeýle hem ol çempionatda 2017-nji ýylda 13 gezek, 2018-nji ýylda 19 gezek, 2019-njy ýylda 12 gezek tapawutlandy. Diýmek, ezber hüjümçi häzir soňky bäş möwsümde iň gowy netijäni görkezýär.  

Altymyrat Annadurdyýewiň 2018-nji ýylda çempionatyň iň netijeli futbolçysy bolandygyny hem ýatladýarys.

Agageldi ITALMAZOW,

 sport synçysy.