Şu hepdäniň ýekşenbe güni geçiriljek duşuşyklar bilen Türkmenistanyň futbol çempionatynyň I ligasynyň Lebap zolagynyň ýaryşlarynyň II aýlawyna badalga berler. Çempion bolan topara ýurt derejesindäki jemleýji ýaryşa gatnaşmaga hukuk berýän zolaklaýyn birinjilige 8 topar gatnaşýar.

7 tapgyrdan ybarat bolan birinji aýlaw «Derýaýollary» önümçilik birleşiginiň «Derýaçy» toparynyň öňdebaryjylygy bilen tamamlandy (19 utuk). 2-nji orundaky «Demirýolçy» öňdebaryjydan 5 utuk yzda barýar. Her biri 13 utuk toplan «Garagum» bilen «Çärjew» 3-nji orny paýlaşýarlar.

Birinji liganyň welaýat zolagy 15-16-njy noýabrda geçiriljek 14-nji tapgyryň duşuşyklary bilen tamamlanar. Ýokarda-da ýazyşymyz ýaly, ýaryşyň ýeňijisi ähli zolaklaryň ýeňijileriniň arasyndaky jemleýji ýaryşa gatnaşar.