Iňlis Premýer ligasynda örän üýtgeşik ýagdaý bolup geçdi. «Braýton» bilen «Mançester Ýunaýtediň» duşuşygynda (2:3) oýnuň tamamlanandygy hakynda jürlewük çalnandan soň on bir metrlik jerime urgusy bellendi. Bu düzgüne laýyk gelýärmikä?
Duşuşygyň emini Kris Kawan tarapyndan oýnuň esasy wagtyna goşulan bäşinji minutda ýer eýeleri hasaby deňlänlerinde, köpler duşuşyk şol hasap bilen deňlikde gutarar diýip pikir etdiler. Ýene iki minutdan bolsa myhmanlar burçdan topy oýna girizmäge hukuk gazandylar hem-de topy oýna girizip derwezä urdular, goragçy topy yzyna gaýtardy. Şol mahal hem emin duşuşygyň tamamlanandygy barada jürlewügini çaldy. Telekrandaky sekundomer 96 minut 35 sekundy görkezýärdi.
«Mançester Ýunaýtediň» oýunçylary dessine emine tarap okduryldylar. Olar «Braýtonyň» oýunçylarynyň biriniň eline top degendigini (az-kem soňra ol «biri» Mope bolup çykdy) hem-de ugruny üýtgedendigini görkezdiler. Wideokömekçilere ýüz tutmaly boldy, emin pursady gaýtadan gördi hem-de duşuşygyň tamamlanandygy barada jürlewügiň çalynandygyna garamazdan, känbir ikirjiňläp durmazdan bada-bat 11 metrlik urgyny belledi.
Biz halkara derejeli emin Çary Gurbanowdan bu ýagdaý barada pikirini aýtmagyny soranymyzda, ol hiç hili ýalňyşlygyň ýokdugyny, eminleriň gelen netijesiniň dogrudygyny tassyklady. IFAB öz döwründe şeýle bir ýagdaýy suratlandyrdy: emin duşuşygyň birinji ýa-da ikinji ýarymynyň tamam bolandygy barada jürlewügini çalýar, şol mahal hem, ýagny emin heniz meýdançadan gitmänkä WAR onuň göz-görtele ýalňyşlyk goýberendigini hasaba alýar.
Şunuň ýaly ýagdaýda wideokömekçiler emine goýberilen ýalňyşlygy haýdan-haý habar bermeli, ol bolsa oýunçylary ýüze çykan ýagdaý bilen habardar edip, olary meýdançada saklamaly. Soňra bolsa emin düzgünnamada görkezilişi ýaly hereket edýär, ýagny ol wideoýazga seredip, oýnuň düzgüniniň bozulandygyny ýa bozulmandygyny barlaýar hem-de netije çykarýar.
Eminiň ýalňyşlygy babatynda aýdanymyzda bolsa Kawanyň oýnuň gutaranlygy hakynda jürlewük çalmagy nädogry. «Mançester Ýunaýted» burçlukdan topy oýna girizensoň, soňra hem derwezä top urlansoň, ol gyssanmaly däldi. Ilki bilen emin wideo boýunça eminler bilen gürleşmelidi, ünsi çekip biljek nähili ýagdaýyň bolandygyny olardan soramalydy, diňe şondan soňra jürlewügi çalmalydy.
Ýöne näme, boljak iş boldy.
