Gazak futbolynyň habarlar portalynda (www.goalkz.kz) Aziýa sebitine wekilçilik edýän ýurtlaryň birnäçesinde Lionel Messä meňzedilýän oýunçylaryň bardygyna ünsi çekipdirler. Bu habar dünýä  çempionatynyň saýlama ýaryşynda Türkmenistan bilen Şri-Lankanyň arasynda geçirilen oýny ýatlatdy.

Türkmen futbolçylarynyň peýdasyna tamamlanan (2:0) şol oýunda žurnalistler horwatiýaly baş tälimiçi Ante Mişeden näme üçin köp gol salyp bilmändiklerini soradylar. Ol bolsa «Bizde ýekeje «Türkmen Messisi» bar, olam Türkmenistanyň iň oňat oýunçylarynyň biri Arslanmyrat Amanow» diýip jogap berdi. Şol metbugat ýygnanyşygyndan taýýarlanan interwýu www.turkmenportal.com saýtynda ýerleşdirildi.

Gazagystanyň www.goalkz.kz saýtynyň «Instagramdaky» sahypasynda ýerleşdirilen maglumatda Ýerkebulan Seýdahmet «Gazak Messisi», Gulžigit Alykulow «Gyrgyz Messisi», Gaý Assulin «Ysraýyl Messisi», Han Çžon Bu «Koreý Messisi» diýlip atlandyrylýar. «Türkmen Messisi» ýagny Arslanmyrat Amanow bu sanawyň üstüni ýetirýär.

Hojaberdi APBAÝEW,

žurnalist.