Şu gün (08.05.2020) ýokary liganyň komandalary Türkmenistanyň futbol çempionatynyň 7-nji tapgyryna başladylar. Aşgabat şäherindäki «Köpetdag» stadionynda ýerli «Köpetdag» Marynyň «Merwini» kabul etdi. Türkmenistanyň Sport we ýaşlar syýasaty ministrliginiň resmi saýtynyň (www.msy.gov.tm) habarçysy bu oýna tomaşa edip, ýer eýeleriniň 7 tapgyrdan soňra 3-nji orna geçenine şaýat boldy.
Oýunda umuman «Köpetdag» artykmaçlyk gazananam bolsa, myhmanlar hem öz mümkinçiliklerini elden gidermediler. Netijede, diýseň çekeleşikli geçen oýunda paýtagtymyzyň komandasy 3:1 hasabynda ýeňşini baýram etdi. Şeýlelikde, 3-nji orunda barýan «Köpetdagyň» 11 utugy bar. «Ahal» 6 oýundan soňra 15, «Altyn asyr» 12 utuk toplapdyr.
2020-nji ýylyň 9-njy maýynda Maryda ýerli «Energetik» bilen duşuşýan «Şagadam» uly hasap bilen utan halatynda 3-nji orna dalaş edip biler. Emma «Energetik» komandasynyň hem ýeňiş gazansa, azyndan 2 basgançak öňe süýşýändigini bellemek gerek. Şeýle-de, 9-njy maýda «Nebitçi» bilen «Altyn asyr» duşuşýandygyny ýatladýarys.
www.msy.gov.tm
