Türkmenistanyň futbol çempionatynyň 7-nji tapgyrynda Balkanabadyň «Nebitçisi» öz meýdançasynda ýurdumyzyň çempiony «Altyn asyr» toparyny kabul edýär. Bu oýnuň öňüsyrasynda Türkmenistanyň Sport we ýaşlar syýasaty ministrliginiň resmi saýtynyň (www.msy.gov.tm) habarcysy «Nebitçi» klubynyň baş tälimçisi Amanmyrat Meredow bilen pikir alyşdy.
—Soňky ýyllaryň statistikasy ýaryş tablisasynda kimiň haýsy orunda ýerleşýändigine garamazdan, «Nebitçi» bilen «Altyn asyryň» arasyndaky oýunlaryň dartgynlylygy bilen tapawutlanýandygyny görkezýär. Şu ýylky oýun hakynda näme aýdyp bilersiňiz?
—Geçen ýylky oýunlary ýatlanamyzda hem munuň şeýledigini aýtmak bolar. Iň soňky minutlarda deňligi elden gidermeli bolanymyz hem şu günki ýaly ýadymda. Şonuň üçin oglanlar tutanýerli taýýarlyk görýärler.
—Möwsüme nähili wezipe goýuldy? Täze möwsümde 2-nji we 3-nji orunlaryň eýeleriniň hem AFK-nyň kubogyna gatnaşmak mümkinçiliginiň bardygy hemme toparlary ekezlendirýän bolsa gerek.
—Häzir dowam edýän çempionatda mynasyp çykyş etmek, ýaryş tablisasynyň öňdäki hatarlaryndan orun almak üçin tagalla edýäris. Onsoňam, Türkmenistanyň kubogy ugrundaky ýaryşa aýratyn üns bereris. Çünki şol ýaryşda netijeli çykyş etmek hem täze möwsümde AFK-nyň kubogyna gatnaşmaga mümkinçilik berýär.
—«Nebitçide» geljegine ynam bildirilýän ýaşlary we tejribeli oýunçylary sazlaşykly çykyş etdirýärsiňiz. Uly ýaşly oýunçylardan kimleri agzap bilersiňiz?
—Azat Garajaýew, Mämmedaly Garadanow, Aşyrgeldi Ylýasow ýaly ussat oýunçylarymyz ýaşlar bilen tejribelerini paýlaşýarlar. Bu ýagdaý bolsa, möwsümi netijeli tamamlamaga kömek eder diýip ynanýaryn.
—Beren gürrüňleriňiz üçin sag boluň!
—Sizem sag boluň!
Söhbetdeş bolan Hojaberdi APBAÝEW.
