Ýakynda 2002-2003-nji ýylda doglan gyzlaryň arasynda gandbol boýunça Türkmenistanyň birinjiligini almak ugrundaky ýaryşyň jemi jemlenildi.

Mary şäheriniň 1-nji sport mekdebinde geçirilen ýaryşda Aşgabat şäheriniň sport we ýaşlar syýasaty Baş müdirliginiň 9-njy (11 türgen) we 11-nji (3 türgen) sport mekdepleriniň türgenlerinden düzülen topar I orna mynasyp boldy. Aşgabat şäheriniň ýygyndysy milli birinjilige tejribeli tälimçi Gülendam Narbaýewanyň ýolbaşçylygynda taýýarlandy.

II orna balkanly türgenlerden düzülen topar mynasyp boldy. Milli birinjiligi kabul eden Mary welaýatynyň türgenlerinden düzülen topar bäsleşigi III orunda tamamlady.

Türkmenistanyň Sport we ýaşlar syýasaty ministrliginiň we Türkmenistanyň gandbol federasiýasynyň guramagynda geçirilen ýaryşyň ýeňijilerine guramaçylar tarapyndan Hormat hatlary we sowgatlar gowşuryldy.

Altyngözel Amanmämmedowa,

Türkmen döwlet medeniýet institutynyň talyby.