Gandbol boýunça Türkmenistanyň birinjiligi. Mary şäherindäki 1-nji sport mekdebinde Türkmenistanyň Sport we ýaşlar syýasaty ministrligi bilen Türkmenistanyň gandbol federasiýasynyň bilelikde guramagynda 2003-2004-nji ýyllarda doglan ýetginjek gyzlaryň we oglanlaryň arasynda Türkmenistanyň birinjiligini almak ugrunda ýaryş geçirildi. 2020-nji ýylyň 24-nji fewralyndan 1-nji martyna çenli aralykda geçirilen birinjilige ýurdumyzyň welaýatlarynyň, şeýle-de Aşgabat şäheriniň ýetginjeklerinden düzülen toparlaryň 12-si gatnaşdy.

Mary şäherinde ýurdumyzyň birinjiligini almak ugrundaky ýaryşda gyzlaryň arasynda Aşgabat şäheri birinji, Balkan welaýaty ikinji, Mary welaýaty bolsa üçünji orunlara mynasyp boldular.  

Ýaryşyň dowamynda paýtagtymyzdan Enegyz Orazdurdyýewa, Aýgül Marutýan, Aýnur Gelenjäýewa, Balkandan Tahira Mursalowa, Wiktoriýa Bondarenko, Lebapdan Umida Durdyýewa, Zöhre Gapurjanowa dagy tapawutlanmagy başardy.

Oglanlaryň arasynda geçirilen ýaryşda Aşgabat şäheri birinji, Lebap welaýaty ikinji, Balkan welaýaty hem üçünji orna mynasyp boldy.  

Oglanlaryň arasyndan paýtagtly türgenler Arslan Muhadow, Asman Balaban, Bahtiýar Ýazyýew, lebaply türgenlerden Myrat Orazmuhammedow, Alijan Bekbaýew, balkanly türgenlerden Raşyt Hojageldiýew, Yhlas Amanow ýaly gandbolçylar tapawutlandylar.

Gandbol boýunça Türkmenistanyň birinjiligini almak ugrundaky ýaryşda ýeňiji bolan toparlara, şeýle-de tapawutlanmagy başaran oýunçylara guramaçylar tarapyndan Hormat hatlary we ýadygärlik sowgatlary gowşuryldy.

Mälim bolşy ýaly, gandbol sporty bütin dünýäde, şol sanda biziň ýurdumyzda hem uly üns berilýän sport görnüşleriniň biridir. 1992-nji ýylyň martynda gandbol sporty boýunça döredilen ýurdumyzyň federasiýasy işe başlan ilkinji gününden häzirki wagta çenli çempionatdyr birinjilik ugrundaky ýaryşlary yzygiderli geçirip gelýär. Geçen ýyllarda sportuň bu görnüşi boýunça milli ýygyndymyzyň türgenleri halkara ýaryşlara gatnaşyp, netijeli çykyş etmegi eýelemegi başardylar.