Gahryman Arkadagymyzyň tagallasy bilen ýurdumyz sportuň durnukly ösdürilýän ýurduna öwrüldi. Sportuň dürli görnüşleri boýunça geçirilýän bäsleşikler, wagyz-nesihat çäreleri bolsa aýdylanlaryň aýdyň görkezijisidir. Şu gün (01.03.2020) türkmen paýtagtynda Saglyk ýoluna köpçülikleýin ýöriş geçirildi. Köpçülikleýin ýörişden soň sportuň dürli görnüşleri boýunça bäsleşikler guraldy. Türkmenistanyň döwlet çeperçilik akademiýasynyň, şeýle-de, Türkmen döwlet ýörite çeperçilik mekdebiniň talyplarynyň türkmen sportuny şöhlelendirýän suratlary bolsa çärä özboluşly öwüşgin berdi. Okuw mekdepleriniň çeper höwesjeňleriniň aýdym-sazly çykyşlary ol ýere baranlara ruhubelentlik paýlady. Biz hem köpçülikleýin sport çäresiniň dowamynda, baharyň ilkinji gününi bu ýerde garşylan ýaşlaryň birnäçesi bilen söhbetdeş bolduk.
Aýgözel Ataýewa, Türkmenistanyň döwlet çeperçilik akademiýasynyň Binagärlik we dizaýn fakultetiniň talyby:
– Hormatly Prezidentimiziň tagallasy bilen ýurdumyz sportuň durnukly ösdürilýän ýurduna öwrüldi. Biz şu gün Saglyk ýoluny uly ruhubelentlikde geçdik. Ýoluň dowamynda deň-duşlarymyz bilen soňky menzile ilki bilen barmak üçin bäsleşdik. Bu aralygy geçenimizden soň sportuň dürli görnüşleri bilen meşgullandyk. Şeýle sport ýörişleriniň geçirilmegi biz talyp ýaşlaryň has-da ruhubelent bolmagymyza getirýär. Nesip bolsa okuwdan boş wagtlarymyz Saglyk ýoluna ýene gelip, öz saglygymyzy berkideris. Bu babatda döredip berýän mümkinçilikleri üçin milli Liderimize alkyş aýdýarys!
Ysmaýyl Tossyýew, «Aşgabat» köpugurly stadionyň işgäri
–Şu günki köpçülikleýin ýörişiň örän täsirli bolandygyny aýratyn bellemek gerek. Biz säheriň arassa howasynda bu ýoly uly höwes bilen geçdik. Dag howasynyň arassalygy göwnüňi açýar. Howanyň salkyn bolmagy we dagyň tämiz howasy süňňüňe argynlygy aralaşdyrmaýar. Şeýle köpçülikleýin ýörişleriň yzygiderli geçirilmegi ýaşlaryň has-da sagdyn we ruhubelent bolmagy üçin örän ähmiýetlidir. Bize sportuň dürli görnüşleri bilen meşgullanmaga döredip berýän mümkinçilikleri üçin hormatly Prezidentimize sagbolsun aýdýarys!
Taýýarlan Allanur ÇARYÝEW,
«Türkmen sporty».
