Türkmenistanyň milli ýygyndysynyň ezber hüjümçisi Wahyt Orazsähedow Täjigistanyň çempiony Duşenbäniň «Istiklol» toparyna geçdi. Indi ol AFK-nyň kubogyny almak ugrundaky bäsleşikde, ýurdumyzyň çempiony «Altyn asyr» we öňki topary «Dordoýa» garşy «Istiklolyň» eşiginde göreş alyp barar.

Geçen möwsümde Bişkegiň «Dordoý» toparynda çykyş edip Gyrgyzystanyň çempiony bolan ildeşimiz iň köp pökgi geçirenleriňem sanawyndan orun alypdy we ol ilki Türkmenistanyň  (Gyrgyzystana gitmezden öň «Altyn asyryň» düzminde ýurdymyzyň çempiony bolupdy), soňam möwsümiň dowamynda Gyrgyzystanyň çempiony bolmagy başaran ilkinji futbolçydyr. Indi bolsa ildeşimizde bu rekordyny has-da baýlaşdyrmak mümkinçiligi döredi.

Eger-de Wahyt «Istiklol» bilen Täjigistanyň çempionlygyny gazansa futbolçymyz, yzly-yzyna Türkmenistanyň, Gyrgyzystanyň we Täjigistanyň çempionlygyny gazanan ilkinji futbolçy bolar. Şeýle bolmak ähtimallygy bolsa gaty ýokary diýsek ýalňyşmarys.

Merdan BAÝAT,

sport synçysy