BAE-de okuw-türgenleşik ýygnanyşygyny geçirýän Türkmenistanyň futzal boýunça milli ýygyndysy BAE-niň Dubaý şäheriniň «Al-Nasr» topary bilen ýoldaşlyk duşuşygyny geçirdi.
«Raşid Bin Hamdan Hall» sport toplumynda geçirilen duşuşyk 5:3 hasabynda ýygyndymyzyň peýdasyna tamamlandy. Toparymyza ýeňiş getiren toplary Abdylla Gurbannepesow (11-nji minut), Mülkaman Annagulyýew (12-nji minut) hem-de Öwezbaý Muhammetmyradow (27-nji, 36-njy, 37-nji minutlar) dagy öz atlaryna ýazdyrdylar.
25-nji ýanwary – 9-njy fewraly aralygynda okuw-türgenleşik ýygnanyşygy dowam edýän milli ýygyndymyz 29-njy ýanwarda ýene-de bir ýoldaşlyk duşuşygyny geçirer.
Milli ýygyndymyz okuw-türgenleşiginiň yzysüresi 2-8-nji fewral aralygyndaTailandyň Songkla şäherinde geçiriljek halkara ýaryşyna gatnaşar. Milli ýygyndymyzdan başga bu ýaryşa Eýranyň, Malaýziýanyň, Tailandyň, Täjigistanyň hem-de Kuweýtiň milli ýygyndylary gatnaşarlar.
Geçirilen bijä laýyklykda, Türkmenistanyň ýygyndysy «A» toparçada Malaýziýanyň (3-nji fewral) hem-de Tailandyň (4-nji fewral) ýygyndylary bilen duşuşar. «B» toparçada Eýranyň, Täjigistanyň hem-de Kuweýtiň ýygyndy toparlary bäsleşerler. Toparçalaýyn bäsleşigiň netijesinde her toparçada ilkinji iki orny eýelän ýygyndylar ýarym finalda çykyş etmäge mümkinçilik alarlar.
Milli ýygyndymyzyň baş tälimçisi horwatiýaly Robert Grdowiç halkara ýaryşynda milli çempionatymyzda çykyş edýän oýunçylary gözden geçirer.
Ýeri gelende bellesek, futzal boýunça 16-njy Aziýa çempionaty 26-njy fewral – 8-nji mart aralygynda paýtagtymyzdaky Olimpiýa şäherçesiniň sport toplumlarynda geçiriler.
www.tff.com.tm
