Futbol boýunça Türkmenistanyň milli ýygyndysy horwatiýaly tälimçi Ante Mişeniň ýolbaşçylygynda 2022-nji ýylda geçiriljek dünýä çempionatynyň saýlama tapgyrynyň duşuşyklaryna taýýarlygynyň çäginde BAE-niň Dubaý şäherinde okuw-türgenleşik ýygnanyşygyny geçirmek üçin ugur aldy. Bu ýygnanyşykda tälimçiler düzümi ýygyndy toparymyzyň bosagasynda duran oýunçylary gözden geçirerler.

 Ýygyndy toparymyzyň BAE-däki okuw-türgenleşik ýygnanyşygy 24-nji ýanwar – 4-nji fewral aralygynda geçiriler. Onuň dowamynda milli ýygyndymyz ýoldaşlyk duşuşyklarynyň üçüsini geçirer.

Milli ýygyndymyzyň okuw-türgenleşik ýygnanyşygynda Ante Mişe onuň ildeşi derwezeçileriň tälimçisi Sandro Tomiç hem-de iki sany ýerli hünärmen, Maksim Belyh bilen Begenç Garaýew kömekleşerler.

Ýeri gelende bellesek, Türkmenistanyň milli ýygyndysy Dünýä çempionaty – 2022-niň hem-de Aziýa Kubogy-2023-iň saýlama tapgyrlarynda çykyş edýär.

Häzirki wagtda, geçirilen duşuşyklarda 9 utuk toplan ýygyndy toparymyz “H” toparçada birinji orny eýeleýär. Bu toparçada ýygyndy toparymyzdan başga Koreýa Respublikasynyň, Liwanyň, KHDR-iň hem-de Şri-Lankanyň milli ýygyndylary çykyş edýärler.

Milli ýygyndymyz dünýä çempionaty – 2022-niň saýlama tapgyryndaky nobatdaky duşuşygyny 2020-nji ýylyň 26-njy martynda Koreýa Respublikasynyň ýygyndysynyň garşysyna myhmançylykda geçirer.

www.fft.com.tm