«Türkmenistan— ruhubelentligiň we sagdynlygyň ýurdy» atly XI sport ýaryşlarynda ýokary okuw mekdebiniň zenan professor-mugallymlarynyň arasynda woleýbol boýunça geçirilen ýaryş tamamlandy.

Ýaryş 6-13-nji ýanwar aralygynda iki toparçada geçirildi. Birinji toparçanyň oýunlary Türkmen döwlet binägärlik we gurluşyk institutynda, ikinji toparçanyň oýunlary Türkmen döwlet ykdysadyýet we dolandyryş institutynda guraldy.

Saýlama ýaryşlarda birinji toparçada Türkmen döwlet binägärlik we gurluşyk instituty, Döwletmämet Azady adyndaky Türkmen milli dünýä dilleri instituty, Halkara nebit we gaz uniwersiteti, Magtymguly adyndaky Türkmen döwlet uniwersiteti çykyş etdiler.

 Ikinji toparçada bolsa Türkmen döwlet bedenterbiýe we sport instituty, Türkmen döwlet ykdysadyýet we dolandyryş instituty, M.Kulyýewa adyndaky Türkmen milli konserwatoriýasy, M.Garryýew adyndaky Türkmenistanyň Döwlet lukmançylyk uniwersiteti özara bäsleşdi.

Ýarym finalda Türkmen döwlet bedenterbiýe we sport instituty Döwletmämet Azady adyndaky Türkmen milli dünýä diller instituty bilen duşuşyp, 3:0 hasabynda üstün çykdy. Şeýle-de, Türkmen döwlet binägärlik we gurluşyk instituty Türkmen döwlet ykdysadyýet we dolandyryş institutyndan 3:0 hasabynda üstün çykyp, final tapgyrynda oýnamaga hukuk gazandy.

Geçirilen duşuşyklaryň netijesi boýunça Türkmen döwlet bedenterbiýe we sport instituty 3:0 hasabynda Türkmen döwlet binägärlik we gurluşyk institutyndan üstün çykyp, geçen ýylky görkezen netijesini gaýtalamagy başardy.

II orna Türkmen döwlet binägärlik we gurluşyk instituty, III orna bolsa Döwletmämet Azady adyndaky türkmen dünýä diller instituty mynasyp boldy.

Aýna AGALYÝEWA,

Döwletmämet Azady adyndaky TMDDI-niň uly mugallymy