Saud Arabystanynda dowam edýän 42-nji «Dakar» rallisinde 5-nji tapgyr tamamlandy. Bäsleşik tapgyrsaýy gyzgalaňly häsiýete eýe bolýar.
Ýeňil ulaglaryň arasyndaky ýaryşda 1-nji tapgyrda litwaly Waidotas Žata («Mini»), 2-nji tapgyrda Günorta afrikaly Žiniel de Williers («Toyota»), 3-nji tapgyrda dünýä belli ispan sürüjisi Karlos Saýns («Mini»), 4-nji tapgyrda fransiýaly Stefan Peter-hansel («Mini») hem-de 5-nji tapgyrda ýene-de Karlos Saýns ýeňiş gazandy. Umumy sanawda 19 sagat 04 minut 13 sekuntlyk netije görkezen Karlos Saýns 1-nji orny eýeleýär.
Motosiklçileriň arasynda 1-nji we 5-nji tapgyrlarda awstraliýaly Tobi Praýs (KTM), 2-nji tapgyrda botswanaly Ross Branç (KTM), 3-nji tapgyrda amerikaly Riki Brabek («Honda») hem-de 4-nji tapgyrda çilili Hoze Ignasio («Honda») ýeňiş gazandy. 19 sagat 07 minut 19 sekuntlyk görkeziji bilen Riki Brabek sanawyň başyny çekýär. Tobi Praýs ondan 09:06 minut yzda barýar.
Ýük ulaglaryna erk edýänleriň bäsleşiginde 3-nji tapgyrda ýeňiş gazanan russiýaly Andreý Karginow («Kamaz») umumy sanawyň başyny çekýär (20:10:02). 1–4-nji tapgyrlarda pellehana öňürti gelen Anton Şibalow watandaşy hem topardaşyndan 14 minut 53 sekuntlyk az netije görkezip, 2-nji hatarda barýar. MAZ toparynyň sürüjisi Sergeý Wýazowiç (Belarus) 3-nji orny eýeleýär.
Kwadrosiklçileriň ýaryşynda çilili Ignasio Kasale («Yamaha») umumy sanawda öňde bolup, ol 1–2–4-nji tapgyrlarda pellehana hemmeden öňürti gelmegi başardy (24:10:47).
Hajymyrat SÖÝÜNOW,
sport žurnalisti.
