Türkmenistanyň dzýudo boýunça milli ýygyndy toparynyň wekili Maýsa Pardaýewa Mongoliýanyň Ulan-Bator şäherinde geçýän «IJF Grand Slam 2026» ýaryşynda – Halkara dzýudo federasiýasynyň «Uly tuwulga» bäsleşiginde üstünlik gazandy. 57 kilogram agram derejesinde göreş düşekçesine çykan ildeşimiz bürünç medala mynasyp boldy. Maýsa ýaryşyň 1/16 finalynda gazagystanly Dana Abdirowadan, 1/8 finalynda Koreýa Respublikasyndan Mimi Huhydan üstün çykdy. Abraýly bäsleşigiň çärýek finalynda ildeşimiz Ysraýyldan gelen Timna Nelson Lewyny ýeňdi.
Türkmen türgeni bürünç medal ugrundaky tutluşykda fransiýaly Faiza Mokdardan üstün çykmagy başardy. Şeýlelikde, Maýsanyň nobatdaky şowly çykyşy olimpiýa maksatnamasyna girýän sport görnüşinden milli mekdebimiziň wekiliniň görkezen ajaýyp netijesi boldy.
«Türkmen sporty» gazeti
