Geçip barýan ýylyň soňky günlerinde paýtagtymyzda we welaýat merkezlerinde milli derejedäki ýaryşlaryň birnäçesi geçirildi. Ol ýaryşlar milli ýygyndylarymyzyň düzümine iň güýçlileri saýlap almak üçin uly ähmiýete eýe boldy. Şeýle ýaryşlaryň biri hem dzýudo boýunça Türkmenistanyň kubogy ugrundaky ýaryşdyr. Bu ýaryşyň netijeleri geljek ýyl halkara ýaryşlarynda, şol sanda Tokioda geçiriljek XXXII Olimpiýa ýounlaryna ýollanma almak ugrundaky ýaryşlarda çykyş etmeli milli ýygyndy toparymyzyň düzümini kesgitlemäge mümkinçilik berdi.
Aşgabadyň Olimpiýa şäherçesiniň Söweş sungatlary toplumynda geçen ýaryşa ýurdumyzyň ähli künjeklerinden ýaş türgenler gatnaşdylar. Ýaryşda gyzlar iki ýaş topary boýunça çykyş etdiler. Şeýlelikde, dürli ýaş toparlarynda medallar toplumynyň 30-sy ýeňijilere we baýrakly orunlary eýelän türgenlere gowşuryldy. Umumytoparlaýyn hasapda birinji orny paýtagtly türgenler eýelediler. Lebap welaýatynyň pälwanlary ikinji, Daşoguz welaýatynyň türgenleri bolsa üçünji orna mynasyp boldular.
Dzýudo boýunça ýetginjeklrer ýygyndy toparynyň häzirki düzümindäki türgenler 2024-nji ýylda Parižde geçiriljek Olimpiýa oýunlaryna gatnaşmaga dalaş etmeli pälwanlar bolup durýarlar. Hünärmenleriň ynandyrmalaryna görä bu örän uly ýaryşa ýaş türgenler eýýäm indiki ýyldan taýýarlyk görmäge başlarlar.
Tokio Olimpiadasy barada aýdanymyzda bolsa, Türkmenistandan bu iri ýaryşa wekilçilik etmek hukugyna türgenleriň ikisi ― halkara derejeli sport ussady Gülbadam Babamyradowa (52 kg çenli) we Türkmen döwlet bedenterbiýe we sport institutynyň talyby, sport ussady Hakberdi Jumaýew (60 kg çenli) dalaş edýärler.
Halkara ýaryşlarynda yzygiderli ýokary netijeler gazanýandygy üçin, Gülbadamyň 2020-nji ýylyň Olimpiýa oýunlaryna şahsy çakylyk almaga oňat mümkinçiligi bar. Hakberdiniň bolsa yklym paýy diýlip atlandyrylýan ýollanma eýe bolmagy ahmal. Bu paýy Halkara dzýudo federasiýasynyň (IJF) wekilleri goşmaça kesgitleýärler.
G. Babamyradowanyň 2016-njy ýylda Rio-de-Žaneýroda (Braziliýa) geçen Olimpiýa oýunlarynda hem ýurdumyza wekilçilik edendigini ýatladýarys. Indi bolsa ol özüniň ikinji Olimpiadasyna gatnaşmaga golaý bardy. Ýaş, ýöne geljegine uly umyt bildirilýän H. Jumaýew ýollanma eýe bolaýsa, bu onuň ilkinji Olimpiadasy bolar.
Ýaşlar we erkekler ýygyndy toparlarymyzyň baş tälimçisi Hudaýberdi Sähedowyň aýtmagyna görä, indiki ýylyň başynda Gülbadam bilen Hakberdi IJF-niň baýdagy astynda geçirilýän okuw-türgenleşiklere gatnaşmak üçin Awstriýa giderler. Olimpiýa oýunlarynyň öňüsyrasy geçirilýän bu däbe öwrülen ýygnanyşyk dünýäniň iň güýçli dzýudoçylaryny özünde jemlär. Olar ýokary derejeli tälimçileriň ýolbaşçylygynda okuw-türgenleşigini geçerler.
Soňra 23-25-nji ýanwarda dzýudoçylarymyz Tel-Awiwde (Ysraýyl) geçiriljek «Gran slam» atly dünýä derejesindäki seçip alyş ýaryşyna gatnaşarlar. Olar bu ýaryşda özleriniň olimpiýa reýtinglerini üzül-kesil ýokarlandyrmaga mümkinçilik alarlar. Fewral aýynda olara Parižiň (Fransiýa) we Dýusseldorfyň (Germaniýa) dzýudo düşekçelerinde şeýle ýaryşlaryň ýene ikisi garaşýar.
«Нейтральный Туркменистан» gazeti (30.12.2019)
