Aşgabat şäherinde GDA-nyň döwlet baştutanlarynyň Geňeşiniň ýokary derejede geçirilen mejlisinde Gahryman Arkadagymyzyň «Ynsanperwer hyzmatdaşlygy ösdürmekde bitiren hyzmatlary üçin» medaly bilen sylaglanmagy, şeýle hem hormatly Prezidentimiziň şol mejlisiň dowamynda eden taryhy çykyşy mynasybetli dabaraly maslahat geçirildi.
Türkmen döwlet bedenterbiýe we sport institutynyň Mejlisler zalynda guralan dabaraly maslahata Türkmenistanyň Sport we ýaşlar syýasaty ministrliginiň wekilleri, ady agzalan ýokary okuw mekdebiniň mugallymlarydyr talyplary gatnaşdylar we çykyş etdiler.
Olar öz çykyşlarynda GDA-nyň Ynsanperwer hyzmatdaşlyk boýunça geňeşiniň hem-de GDA gatnaşyjy döwletleriň Ynsanperwer hyzmatdaşlyk boýunça Döwletara gaznasynyň (YHDG) müdiriýetiniň Türkmenistanyň Prezidentini «Ynsanperwer hyzmatdaşlygy ösdürmekde bitiren hyzmatlary üçin» medaly bilen sylaglamak hakyndaky çözgüdiniň milli Liderimiziň alyp barýan ynsanperwer daşary syýasatyna berlen ýokary bahadygyny buýsanç bilen nygtadylar. Şeýle-de, milli Liderimiziň taryhy çykyşyndan gelip çykýan wezipeleri durmuşa geçirmäge işjeň gatnaşjakdyklaryna ynandyrdylar.
Türkmenistanyň Sport we ýaşlar syýasaty ministrligi bilen Türkmen döwlet bedenterbiýe we sport instituty dabaraly maslahatyň guramaçysy bolup çykyş etdi.
