Ýurdumyzyň çempiony «Arkadag toparynyň milli futbol çempionatymyzdaky ýeňişli ýoly halkara arenasynda hem dowam edýär. AFK-nyň Çagyryş ligasynyň çärýek finalynyň ilkinji duşuşygyny myhmançylykda Hindistanyň «Ist Bengal» topary bilen geçiren Türkmenistanyň çempiony garaşylan ýokary derejeli oýny görkezmegi başardy.

Kalkutta şäheriniň «Solt-Leýk» stadionynda geçirilen duşuşygyň ilkinji minutlaryndan hüjüm futboluny öňe süren ildeşlerimiz duşuşygyň 11-nji minutynda öňe saýlandylar. Şol pursat toparymyzyň ýarymgoragçysy Ýazgylyç Gurbanowyň daş aralykdan depen topy netije getirdi – 1:0. Şondan soň hüjüm bilen goragy sazlaşykly alyp baran toparymyz özüne gerek hasaby saklamagy başardy. 12-nji martda Arkadag şäherindäki 10 müň orunlyk stadionynda geçiriljek jogap oýnunyň öňüsyrasynda şeýle artykmaçlyk gazanan «Arkadag» toparynyň ýarymfinala barýan ýoldaky wajyp ädimini ädendigini bellemek gerek.

«Türkmen sporty» gazeti