Türkmenistanyň futbol çempionatynyň Ýokary ligasynda 24- tapgyryň duşuşyklary geçirildi. Bu duşuşyklardan soňra janköýerler özlerini gyzyklandyrýan köpsanly sowallaryň birnäçesine jogap tapdylar. Möwsümiň ahyrlamagy bilen sowallaryň aglabasynyň jogabynyň tapyljakdygy düşnüklidir. Şonuň üçinem, her bir tapgyryň oýny janköýerlerde uly gyzyklanma döredýär. Has dogrusy, her bir duşuşyk futbolsöýüjiler üçin özboluşly sowgat bolýar.
Paýtagtymyzda geçirilen duşuşykda «Altyn asyr» topary Türkmenbaşynyň «Şagadamyny» kabul etdi. Bu duşuşykda ýer eýeleri 4:1 hasabynda üstün çykdylar. Balkanabatda ýerli «Nebitçi» «Köpetdagy» kabul etdi. Bu duşuşyk 3:1 hasabynda myhmanlaryň peýdasyna tamamlandy.
Ýurdumyzyň futbol çempionatynyň 24-nji tapgyrynyň çäginde paýtagtymyzyň «Nusaý» stadionynda geçirilen duşuşykda «Aşgabat» Mary şäheriniň «Energetik» toparyny kabul etdi. Bu oýunda «Aşgabat» 6:1 hasabynda ýeňiş gazandy. Maryda «Merw» bilen «Ahal» toparlary duşuşyp, bu oýunda 1:0 hasabynda myhmanlar ýeňişlerini baýram etdiler.
Çempionatyň tamamlanmagyna az wagt galdy. Öňde baýrakly orunlary kimleriň eýelejekdigi doly kesgitlener, şeýle-de Türkmenistanyň kubogynyň eýesi belli ediler.
