Türkmenistanyň Sport we ýaşlar syýasaty ministrliginiň resmi saýtynyň (www.msy.gov.tm) habarçysy «Ahalyň» ýarymgoragçysy Eman Tagaýew bilen duşuşyp, nobatdaky tapgyr we umuman milli çempionatymyz barada pikir alyşdy.

—6-njy tapgyrda siziň çykyş edýän «Ahal» toparyňyz «Energetigi» kabul edýär. Şu oýun barada aýdaýsaňyz?!

—«Energetik» güýçli garşydaşlarymyzyň biri hasaplanýar. 5-nji tapgyrda «Altyn asyr» bilen utuk paýlaşandygy, iň soňky minutlarda ýeňlişden halas bolup başaranlygy bu aýdylanlary tassyklaýar. Şonuň üçin bize aňsat oýun garaşýar diýip bolmaz. Hatda ýeňilsegem ony tötänlik hasaplap bolmaz. Şol bir wagtyň özünde «Ahalyň» diňe ýeňiş gazanmagy, özem çempion bolmagy wezipe edip goýan topardygyny ýatdan çykarmaly däldiris.  

— «Altyn asyr» bilen oýundaky şowsuz netije barada näme aýdyp bilersiňiz?

—Futbol adaty bir oýun, onda birde utýarsyň birde utulýarsyň. Ýöne şol oýunda netijeli çykyş etmek üçin az tagalla etmedik. Oýnuň depgininden çen tutsaň, ol 1:0 bolubam, ýa-da 1:1 bolubam tamamlanyp bilerdi. Öňde «Altyn asyr» bilen ýene-de üç gezek duşuşmaly. Nesip bolsa, indiki oýunlarda janköýerlerimizi begendirmek üçin tagalla ederis. Iň möhüm zat, häzir biz kerweniň başyny çekýäris.

— Siz häzir iň köp pökgi geçiren futbolçylaryň sanawynda öňdeligi eýeleýärsiňiz.

—Ilkinji maksadymyz topar bolup «Ahalyň» öňde goýan maksadyny amala aşyrmak, ýagny çempion bolmak. Kimiň köp tapawutlanany ikinji mesele bolup durýar. Nesip bolsa maksadymyza ýetmek üçin yhlas ederis. Menem umumy üstünlige şahsy goşandymy goşmak üçin elimden gelenini ederin!

—Üstünlik hemraňyz bolsun!