Aziýanyň futbol konfederasiýasynyň baýdagy astynda geçirilýän ýaryşlarda Türkmenistana wekilçilik edýän toparlaryň üçüsi («Ahal», «Altyn asyr», «Merw») çykyş edýär.
Türkmenistanyň çempiony «Ahal» AFK-nyň Çempionlar ligasynda, milli çempionatda baýrakly orunlary eýelän «Altyn asyr» bilen «Merw» bolsa AFK-nyň kubogynda ýurdumyzyň sport abraýyny goraýar.
Aziýa yklymynyň abraýly ýaryşlarynda çykyş edýän ildeşlerimiziň toparçadaky bäsdeşleri milli çempionatda nobatdaky duşuşyklaryny geçirdiler.
«Ahalyň» 1-nji tapgyrdaky bäsdeşi «Al-Feýha» öz meýdançasynda «Al-Şabab» toparyndan utuldy. 52-nji minutda myhmanlaryň marokkoly legioneri Romen Saiss «Al-Şababa» çempionatdaky ilkinji ýeňşi getiren goly tora saldy. 74-nji minutda Nader Al-Şarari («Al-Şabab») meýdançadan çykarylsa-da, «Al-Feýha» san taýdan artykmaçlygyny peýdalanyp bilmedi. 6 tapgyrdan soň 6 utuk toplan «Al-Feýha» 9-njy orny eýeleýär.
«Abdyş Ata» altyn medal ugrundaky esasy bäsdeşleriniň biri «Alaýy» kabul edip, 1:2 hasabynda utuldy. Milli çempionatda 2-nji orunda barýan «Abdyş Ata» bu oýundan soňra 38 utuk (20 oýunda) bilen ozalky ornuny saklap galdy. Kerweniň başyny çekýän «Dordoýyň» 39 utugy, 3-nji orny eýeleýän «Alaýyň» 37 utugy bar.
Täjigistanyň çempionatynda 31 utuk (18 oýun) bilen 2-nji orny eýleýän «Rawşan» myhmançylykda «Kuktoş» toparyndan 2:0 hasabynda üstün çykdy. Ýaryş tablisasynda 3-nji orny eýeleýän «Kuktoş» klubunyň 18 oýundan soňra 29 utugy bar.
